परीक्षालाई जितेका विश्वासका पुर्खाहरू

शैतानले संसार सृष्टि भएको समयदेखि नै परमेश्वरका सन्तानहरूलाई परीक्षामा पार्न विभिन्न धूर्त चाल चल्दैआएको छ । हामीले परमेश्वरको आशिष् पाएर अनन्त स्वर्गमा प्रवेश गर्नको निम्ति शैतानका यस्ता परीक्षाहरूलाई जित्नैपर्छ ।

बाइबलमा शैतानको परीक्षालाई जितेर आशिष् पाएका विश्वासका पुर्खाहरूको कार्यसम्बन्धी थुप्रै अभिलेखहरू छन् । तिनीहरूको कार्यबारे अध्ययन गरेर हामीहरू परीक्षालाई जित्नको निम्ति लिनुपर्ने विश्वासबारे जान्ने समय लिऔं ।

१. येशूज्यू

४० दिनसम्म उपवासको प्रार्थना गर्नुभएपछि येशूज्यूलाई शैतानले ३ किसिमले परीक्षा गऱ्यो । येशूज्यूले त्योद्वारा, हामीले उहाँलाई विश्वास गरेर पछ्याउँदा आइपर्ने परीक्षाको विषयमा पहिल्यै जानकारी दिनुभयो । पहिलो, मानिसको सबैभन्दा कमजोर पक्ष रहेको भोजनको परीक्षा आइपर्दा येशूज्यूले “मानिस रोटीले मात्र होइन, तर परमेश्वरको मुखबाट निस्केको हरेक वचनले जीवित रहँदछ” भन्ने वचनद्वारा परीक्षालाई जित्नुभयो । दोस्रो, दियाबलसले परमेश्वरको शक्तिको परीक्षा गर्दा येशूज्यूले “तैंले परमप्रभु आफ्ना परमेश्वरको परीक्षा नगर्नू” भन्ने वचनद्वारा प्रतिकार गर्नुभयो । अनि तेस्रोचाहिँ यस संसारका सबै राज्य र वैभव दिने शर्तमा दियाबलसले मलाई दण्डवत् गर्नू भनेर बहकाउन खोज्दा येशूज्यूले “तैंले परमप्रभु आफ्ना परमेश्वरलाई दण्डवत् गर्नू, र उहाँको मात्र सेवा गर्नू” भन्नुहुँदै दियाबलसलाई धपाउनुभयो । येशूज्यूले यी सबै परीक्षाहरूलाई जित्नुभयो, र हामीले पनि जस्तोसुकै परीक्षा आए तापनि त्यसलाई जित्न सक्नुपर्छ भन्ने कुरा उदाहरणस्वरूप देखाइदिनुभयो (मत्ती ४:१-११) ।

२. अय्यूब

परमेश्वरप्रति साँचो विश्वास लिएका अय्यूबलाई परीक्षा गर्न दियाबलसले थुप्रै कठिनाइहरू ल्यायो । अय्यूबले आफ्नो सबै धन-सम्पत्ति गुमाए, र तिनका छोरा-छोरीहरू सबै मारिनुको साथै तिनको शरीरभरि कष्टप्रद खटिरा उब्जियो । तिनकी पत्नी र साथीहरूले समेत तिनलाई “परमेश्वरलाई सराप्नुहोस् र मर्नुहोस्” भने तापनि परमेश्वरप्रतिको अय्यूबको विश्वास अन्त्यसम्म स्थिर रह्यो । यी सबै परीक्षाहरूलाई जितेपछि परमेश्वरले तिनीमाथि अझ धेरै आशिष् बर्साइदिनुभयो । परीक्षामा पर्नुअघिको भन्दा दुई गुणा बढी धन-सम्पत्ति र धेरै सन्तानसमेत आशिष्‌को रूपमा दिनुभयो । अनि तिनले पहिलेको भन्दा अझ आनन्द र आशिष्‌भित्र परमेश्वरको सेवा गर्दै बाँकी जीवन बिताए (अयू ४२:१०-१७) ।

३. योसेफ

आफ्ना दाजुहरूबाट ईर्ष्या गरिएर मिश्रमा दासको रूपमा बेचिएका योसेफ, पोतीफर(फारोका एक अधिकारी)को घरमा जाँदा तिनलाई ठूलो परीक्षा आयो । पोतीफरकी पत्नीको दृष्टिकोणमा योसेफ हेर्नमा एकदमै सुन्दर र हट्टाकट्टा देखिएकाले तिनले दिनदिनै योसेफलाई परीक्षा गर्न खोजिन् (उत ३९:७-१०) । तर योसेफचाहिँ केवल परमेश्वरलाई सोच्दै अन्ततः परीक्षाबाट विजय हुन सफल भए । यसरी परमेश्वरलाई मात्र सोच्दै शैतानको परीक्षालाई जितेका योसेफ, पछि गएर परमेश्वरको सहयोग र आशिष्‌द्वारा मिश्रका अधिपति बने, अनि तिनले आफ्ना परिवारलाई पनि बचाउन सके (उत ४१:४०-४३) ।

४. प्रेरित पावल

सुसमाचार प्रचार गर्ने क्रममा प्रेरित पावलले एक कम चालीस कोर्रा पाँच पल्ट खाए, ढुङ्गाले हिर्काइए, अनि एक दिन र एक रात समुद्रमा नै बिताए । अनि तिनी नदीहरूका जोखिममा, डाँकूहरूका जोखिममा, आफ्नै जातिका मानिसहरूका जोखिममा, अन्यजातिहरूको जोखिममा, सहरको जोखिममा, उजाड-स्थानको जोखिममा, झूटा भाइहरूबाट आउने जोखिममा परे । परिश्रममा र कष्टमा, कति-कति अनिदो रातमा, भोक र प्यासमा, बारम्बार उपवासमा, ठन्डी र नग्नतामा परे (२ कोर ११:२३-२८) । तर सुसमाचारमा बाधा ल्याउने दियाबलसका विभिन्न परीक्षाहरूको बाबजुद तिनले दृढ विश्वास लिएर कर्तव्यनिष्ठ भई अन्त्यसम्मै सुसमाचार सुनाएकाले तिनले स्वर्गमा तयार भएको धार्मिकताको मुकुट प्राप्त गर्न सके (२ तिमो ४:८) ।

५. दानिएल

दानिएलले राजाबाहेक अरू कसैको नाउँमा प्रार्थना गरे भने तिनलाई सिंहको खोरमा फ्याँकिने धम्की दिइएको थियो । तर सदाझैँ तिनले दिनमा ३ पल्ट यरूशलेमतिर फर्केर घुँडा टेकी परमेश्वरलाई प्रार्थना चढाए । अन्ततः राजाको आदेश उल्लङ्घन गरेको दोषमा दानिएललाई सिंहको खोरमा फ्याँकियो, तर परमेश्वरको सहयोगद्वारा तिनी सिंहहरूबाट बचाइएर सुरक्षित रहन सके । त्यो घटनाद्वारा दानिएलले धेरै मानिसहरूमाझ परमेश्वरको महिमा प्रकट गरे (दान ६:१-२८) ।

६. शद्रक, मेशक, अबेद्‌नगो

दानिएलका ३ साथीहरू शद्रक, मेशक र अबेद्‌नगोलाई मूर्तिको अगि घोप्टो परेर दण्डवत् नगरेमा दन्किरहेको आगोको भट्टीमा फालिने धम्की र परीक्षा आए तापनि तिनीहरू मूर्तिलाई दण्डवत् नगरी अन्तिमसम्म विश्वासमा स्थिर रहे । अन्ततः तिनीहरू सामान्यभन्दा ७ गुणा बढी तातो आगोको भट्टीमा फ्याँकिँदा समेत तिनीहरूको शिरको एउटा रौँ पनि खहरिएन, र तिनीहरूमा आगोको गन्धसमेत थिएन । यो देखेर चकित भएका बेबिलोनका राजा नबूकदनेसर र तिनका राज्यपालहरूले परमेश्वरको महिमा गरे । त्यसपछि राजाले शद्रक, मेशक र अबेद्‌नगोलाई बेबिलोनको प्रान्तमा पदोन्नति गरिदिए (दान ३:१-३०) ।

यो युगमा पनि हाम्रो विश्वासलाई ढलपल गराएर हामीलाई परमेश्वरको इच्छाअनुसार गर्न नदिने केही दुष्ट शक्तिहरू छन् । तर जस्तोसुकै कठिनाइ र परीक्षा आए तापनि अन्त्यसम्म विश्वासलाई जोगाएर ठूलो आशिष् पाएका बाइबलभित्रका विभिन्न पात्रहरूजस्तै, हामीहरू पनि परमेश्वरप्रतिको विश्वासलाई अन्त्यसम्म जोगाएर प्रशस्त आशिष् प्राप्त गरी स्वर्ग फर्कन सक्ने हुनुपर्छ ।

समीक्षात्मक प्रश्न

येशूज्यूलाई शैतानले के-कस्तो किसिमको परीक्षा गरेको थियो ? अनि येशूज्यूले ती परीक्षाहरूलाई कसरी जित्नुभयो ?

प्रेरित पावलले शैतानको परीक्षालाई जितेर कस्तो आशिष् पाए ?

विश्वासका पुर्खाहरूको कार्यलाई हेरेर, शैतानको परीक्षालाई जित्न सकिने तरिकाको विषयमा विचार गरौं ।