धैर्य धारण गरेर आशिष् पाएका विश्वासका पुर्खाहरू

बाइबलमा, धैर्य धारण गरेर आशिष् पाएका विश्वासका पुर्खाहरूका कार्यसम्बन्धी थुप्रै अभिलेखहरू छन् । तिनीहरूको कार्यद्वारा, यो युगमा हामीले लिनुपर्ने धैर्यताको मनस्थितिबारे अध्ययन गर्नेछौं ।

१. अय्यूबको धैर्यता

परमेश्वरले हेर्नुहुँदा अय्यूब धर्मी र निर्दोष मानिस थिए । छोरा-छोरीहरू पनि धेरै भएका तिनी समृद्ध थिए, अनि तिनलाई कुनै कुराको कमी थिएन । अय्यूबको डाह गरेको शैतानले अय्यूबलाई सहनै गाह्रो हुने परीक्षा गऱ्यो । अय्यूबले आफ्नो सम्पत्ति र सन्तानहरूसमेत गुमाए । यद्यपि ती सबै परीक्षाहरूको बाबजुद अय्यूबले गनगन नगरी केवल परमेश्वरलाई प्रशंसा गरे ।

… भने, “म आफ्नी आमाको गर्भबाट नाङ्गै आए, अनि म नाङ्गै फर्केर जानेछु । परमप्रभुले दिनुभयो अनि परमप्रभुले लानुभयो, परमप्रभुको नाउँ धन्यको होस् ।” यी सबै कुरामा अय्यूबले परमेश्वरलाई गलत कामको दोष लगाएर पाप गरेनन् । अयू १:२१-२२

शैतानले अय्यूबको पैतालादेखि टाउकोसम्मै कष्टप्रद खटिरा उब्जाइदिएर लगातार परीक्षा गऱ्यो । अय्यूबकी पत्नीले तिनलाई “के अझै पनि परमेश्वरलाई विश्वास गरिरहनुहुन्छ ? परमेश्वरलाई सराप्नुहोस् र उहाँबाट फर्कनुहोस्” भनिन् । तर त्यस्तो चरम अवस्थामा समेत अय्यूबले परमेश्वरप्रतिको आफ्नो विश्वासलाई दह्रिलो गरी कायम राखे ।

अय्यूबले जवाफ दिए, “तिमी एक मूर्ख आइमाईजस्तै कुरा गर्दछ्यौ । परमेश्वरबाट हामीले सुखचाहिँ ग्रहण गर्ने र दु:ख ग्रहण नगर्ने ?” यी सबै कुरामा आफूले बोलेको कुरामा अय्यूबले पाप गरेनन् । अयू २:१०

यसरी परमेश्वरप्रतिको आफ्नो विश्वासलाई जोगाएर शैतानको दुष्ट षड्यन्त्रमाथि विजयी भएका अय्यूबलाई परमेश्वरले प्रशस्त आशिष् दिनुभयो । तिनका सबै धन-सम्पत्तिहरू पहिलेको भन्दा दुई गुणा बढाइदिनुभयो, र सन्तानहरू पनि धेरै दिनुभयो । अय्यूबले चरम पीडाको बीचमा पनि अन्त्यसम्म आफ्नो विश्वासलाई जोगाएर आशिष् पाउन सक्नुको कारणचाहिँ तिनले धैर्य धारण गरेकाले थियो । हामीले पनि अय्यूबको उदाहरणलाई पछ्याउँदै सम्पूर्ण कठिनाइहरूलाई धैर्यताद्वारा जितेर परमेश्वरबाट प्रशस्त आशिष् प्राप्त गर्नुपर्छ ।

हेर, धैर्य धारण गर्नेहरूलाई हामी धन्यका भन्छौं । तिमीहरूले अय्यूबको स्थिरताको विषयमा सुनेका छौ, र प्रभुको अभिप्राय देखेका छौ, कि प्रभु कस्तो करुणामय र कृपालु हुनुहुन्छ । याक ५:११

२. प्रेरित पावलको धैर्यता

सुसमाचार प्रचार गर्ने क्रममा प्रेरित पावल विभिन्न परीक्षा र कठिनाइबीच गुज्रिए । तिनी धेरै पल्ट कैदमा परे, एक कम चालीस कोर्रा ५ पल्ट खाए, ढुङ्गाले हानिए, तिनी चढेको जहाज ध्वस्त भयो, एक दिन एक रात समुद्रमा बिताए । तिनी नदीहरूका जोखिममा, डाँकूहरूका जोखिममा, आफ्नै जातिका मानिसहरूका जोखिममा, सहरको जोखिममा, उजाड-स्थानको जोखिममा, समुद्रको जोखिममा, झूटा भाइहरूबाट आउने जोखिममा परे । परिश्रममा र कष्टमा, कति-कति अनिदो रातमा, भोक र प्यासमा, बारम्बार उपवासमा, ठन्डी र नग्नतामा परे (२ कोर ११:२३-२७) । यस्ता चरम कठिनाइहरूको बाबजुद तिनले अन्त्यसम्मै आफ्नो विश्वास जोगाएकाले परमेश्वरबाट धेरै आशिष् प्राप्त गरे ।

प्रेरित पावलले सबै प्रकारका कठिनाइहरूलाई सहन सकेका चाहिँ तिनले धैर्य धारण गरेकाले हो । तिनले सुरुको मण्डलीका सन्तहरूलाई पनि धैर्य धारण गर्दै विश्वासको बाटो हिँड्नुपर्छ भनेर जोड दिए ।

यसकारण यतिका साक्षीहरूको ठूलो बादलले हामीलाई घेरिराखेको हुनाले, हरकिसिमका बोझा र हामीलाई सजिलैसित अल्झाउने पापलाई पन्छाएर हाम्रा सामुन्ने राखिदिएको दौड धैर्यसाथ दौडौं । हिब्रू १२:१

धैर्यताद्वारा कठिनाइ र परीक्षालाई जितेर परमेश्वरको आशिष् पाएका प्रेरित पावललाई हामीले याद गर्नुपर्छ । धैर्यताविना कदापि आशिष् प्राप्त गर्न सकिँदैन । हामीहरू जस्तोसुकै कठिनाइ आइपरे तापनि अन्त्यसम्म धैर्य धारण गर्दै जितेर परमेश्वरले प्रतिज्ञा गर्नुभएको आशिष् प्राप्त गर्ने सन्तहरू होऔं ।

परमेश्वरको इच्छा पूरा गर्न र प्रतिज्ञा गरिएको प्रतिफल प्राप्त गर्न तिमीहरूलाई स्थिर रहनु आवश्यक छ । हिब्रू १०:३६

समीक्षात्मक प्रश्न

अय्यूबले शैतानको परीक्षामा पनि अन्त्यसम्म परमेश्वरप्रतिको विश्वासलाई जोगाएर आशिष् प्राप्त गर्न सकेका चाहिँ तिनले कस्तो मन लिएकाले थियो त ?

प्रेरित पावलले हिब्रू १०:३६मा, धैर्य धारण गर्नुपर्ने कारणबारे कसरी वर्णन गरेका छन् ?