सहचालक र यात्रु
लेख सुन्नुहोस्
1:57
यात्रुहरूको टिकेट जाँच गर्ने क्रममा रेलका सहचालकले एक जना यात्रुलाई भनेछन् ।
“तपाईं गलत रेलमा चढ्नुभएको रहेछ । अर्को स्टेसनमा ओर्लिएर अर्को रेल चढ्नुहोस् ।”
ती सहचालकले अर्को यात्रुलाई पनि त्यसै भनेछन् ।
“तपाईं गलत रेलमा चढ्नुभएको रहेछ । कृपया अर्को स्टेसनमा ओर्लिएर अर्को रेल चढ्नुहोस् ।”
तर टिकेट जति जाँच गऱ्यो त्यति नै गलत रेलमा चढेका यात्रुहरूको संख्या बढ्दैगयो । सबै यात्रुहरू गलत रेलमा चढेको कुरा थाहा हुँदा एक जना यात्रुले विनम्रतापूर्वक सहचालकलाई सोधेछन् ।
“माफ गर्नुहोस्, कतै तपाईं नै गलत रेलमा चढ्नुभएन ?”
बुझिहेर्दा, ती सहचालक नै गलत रेलमा चढेका रहेछन् ।
