भाषा चयन गर्नुहोस् ।
अक्टोबर २ तारिखचाहिँ यूएनले सन् २००७मा घोषणा गरेको ‘विश्व अहिंसा दिवस’ हो । हिंसारहित शान्तिपूर्ण संसारको कामना गरिने यस दिनमा, परमेश्वरको मण्डली विश्वविद्यालय विद्यार्थी स्वयंसेवा सङ्गठन आसेज(ASEZ)ले विश्वभर “वाक हिंसा निषेध” क्याम्पेन आयोजना गऱ्यो ।
अक्टोबर २ ~ ११ तारिखसम्म दश दिन आयोजना गरिएको क्याम्पेनचाहिँ, “तरवारभन्दा बोली शक्तिशाली” भन्ने नाराअन्तर्गत वाक हिंसाको गम्भीरताबारे सबैलाई अवगत गराउने र सही वाक संस्कारतिर डोऱ्याउने उद्देश्यका साथ सुरु गरिएको हो । सन् २०१९मा कोरियाको प्राथमिक, माध्यमिक र उच्च माध्यमिक तहका १० लाख विद्यार्थीहरूमाझ गरिएको विद्यालय हिंसा सर्वेक्षणमा, सबैभन्दा पहिलो किसिमको हिंसा नै वाक हिंसा रहेको देखियो । सोही वर्ष श्रम तथा रोजगार मन्त्रालयद्वारा गरिएको कार्यस्थल सर्वेक्षणमा पनि बदमाशीको सबैभन्दा पहिलो किसिम पनि वाक हिंसा नै रहेको पाइयो । इन्टरनेट र स्मार्टफोनको प्रयोगका कारण साइबर हिंसा दिनानुदिन बढ्ने क्रममा करीब ७,००० मानिसहरूमा गरिएको सर्वेक्षणले पनि साइबर हिंसाको सबैभन्दा मुख्य किसिम नै साइबर वाक हिंसा रहेको कुरा प्रकट गऱ्यो ।
क्याम्पेनको अवधिमा ASEZले दैनिक जीवनमा एकसाथ वाक हिंसाविरुद्ध लड्ने वाचा गर्दै आफ्नो वेबसाइटमार्फत अनलाइन हस्ताक्षर सङ्कलन अभियान गऱ्यो । अनि वाक हिंसालाई निषेध गर्न, सही बोलीको प्रयोग गर्न र अरूमाझ हौसलापूर्ण बोली बोल्न सक्रियतापूर्वक प्रोत्साहन दियो । साथै कसम खाने, दोष लगाउने, थर्काउने जस्ता १२ किसिमका वाक हिंसाहरू पोस्ट गरी ASEZले “तपाईंले गर्न सक्नुहुन्छ ! म सधैँ तपाईंको साथमा छु” भन्ने जस्ता हौसलापूर्ण बोलीहरू प्रस्तुत गऱ्यो ।
यसको आधारमा ASEZ सदस्यहरू अनलाइन र अफलाइनको भाषा संस्कारलाई सुधार्नतिर अग्रसर भए । अनलाइनमा सदस्यहरूले इन्टरनेटका लेख र पोस्टहरूमा राम्रो टिप्पणी लेखेर स्वस्थ इन्टरनेट संस्कार निर्माण गर्न प्रयत्न गरे । अफलाइनमा चाहिँ कोभिड-१९का कारण थकित भएका परिवारजन र चिनाजानाहरूलाई दिनमा कम्तीमा एक पटक ‘उत्कृष्ट’ भन्ने अर्थमा thumbs up(बूढी औँला उठाउने) जस्ता प्रोत्साहनका बोलीहरू बोले । ASEZको क्याम्पेनद्वारा सहानुभूति प्राप्त गरी वाक हिंसा निर्मूल पार्न सँगै सहभागी हुने अर्थमा ८१ वटा देशका १३ हजारभन्दा बढी मानिसहरूले समर्थनयुक्त हस्ताक्षर गरे ।
कोरियाको सङसिन महिला विश्वविद्यालयबाट सिस्टर गिम यु बिनले भनिन्, “मैले दिनमा तीन पल्ट मेरो परिवारलाई ‘धन्यवाद’ भनें । सुरुमा अप्ठ्यारो भए पनि चाँडै नै मेरो परिवारमा मेलमिलाप छायो, र घरको माहोल पनि सकारात्मक बन्यो ।” कोरियाको दोङआ विश्वविद्यालयबाट सिस्टर गो ना यङले भनिन्, “मैले लगातार राम्रा टिप्पणीहरू पोस्ट गरेकीले मेरो दैनिक जीवनलाई चोट पुऱ्याउने बोलीहरूमा मैले ध्यान दिन थालें, र नम्र बोली प्रयोग गर्न अभ्यास गरें । नसोचीकन बोलिने बोलीले भविष्यमा हिंसा नित्याउन सक्छ भन्ने कुरालाई मनन गर्दै अब मचाहिँ, चोट लागेको हृदयमा प्रेमको बोलीद्वारा मलहमपट्टी लगाउने भूमिका निर्वाह गर्न चाहन्छु ।”
‘बोली’को शक्ति अद्भुत छ । सानो बोलीले पनि कसैमा आशा जगाउन सक्छ, त कसैमा निराशा । प्रेम बाँड्दै हौसलापूर्ण बोलीद्वारा, हिंसामुक्त संसार निर्माण गर्न ASEZका पाइलाहरू सन् २०२१मा पनि निरन्तर जारी रहनेछ ।
